Prostat ağrısı
Prostat ağrısı adətən bu orqanda iltihabi proses nəticəsində meydana çıxır. Bildiyimiz kimi prostat vəzi kişi cinsiyyət sisteminin mühüm orqanlarından biridir. Bu parenximatoz, yəni vəzili orqan cinsi hormonların ifrazında iştirak edir.
Prostatda ağrı cinsi əlaqə zamanı hiss edilə, fiziki yük və ya ağırlıq qaldırdıqda daha da kəskinləşə bilər. Prostat xəstəliyi ilə əlaqəli sancılar qasıq, aralıq, xayalıqda və oma nahiyəsində hiss olunur. Sancı sinir uclarının qıcıqlanması səbəbindən yaranır.
Prostat ağrısı – xüsusiyyətləri
Sancılar müxtəlif xarakter və intensivlikdə olur. Xəstələrdə zəif, kəskin, deşici, kəsici, göynədici ağrılar müşahidə edilir. Əksər hallarda cinsi əlaqədən uzunmüddət imtina etdikdə ağrı hissi azalır və ya tamamən itir. Ereksiya və sperma mayesinin ifrazı ilə əlaqədar anidən kəskinləşir. Ağrının xarakteri androloqa iltihabi prosesin hansı mərhələdə olduğunu aydınlaşdırmağa imkan verir.
Kəskin prostatit ağrısı
Kəskin prostatitdə ağrılar ani, kəskin, intensiv olur. Həkim vəzini palpasiya etdikdə (əllə müayinə) sancılar şiddətlənir.
Xroniki prostatit ağrısı
Xroniki prostatitdə xəstələr anal dəlik, qasıq nahiyəsi və xayalıq ətrafında göynədici ağrılardan şikayət edirlər. Vəzin həkim tərəfindən palpasiyası qarnın aşağı hissəsində və penis başında sancı ilə müşayiət olunur.
Xərçəng xəstəliyində prostat ağrısı
Prostat xərçənginin gecikmiş mərhələlərində sümük sisteminə birincili metastaz zamanı xəstələri qalça, çanaq, bel və oma nahiyələrində ağrılar narahat edir.
Vəzdə ağrılar digər mühüm xəstəliklərdən də qaynaqlana bilər. Bunlar aşağıdakılardır:
- Prostat adenoması;
- Prostat vəzində daş və ya kalsinatlar;
- Kista
Ağrının digər səbəbləri
Bel və aralıqda formalaşan ağrılar hər zaman prostat vəzinin problemlərindən irəli gəlmir. Onlar digər xəstəliklər: ostoeoxondroz, fəqərəarası disk yırtığı, paraproktit və s. fonunda da müşahidə oluna bilər. Buna görə də androloq həkimlər xəstələri hər zaman ətraflı müayinə edərək, yalnız laborator və instrumental nəticələrinə əsasən diaqnoz qoyurlar.
Xülasə
Kişilər bilməlidirlər ki, prostata aid xəstəliklərin vaxtında aşkarlanması və müalicəyə başlanılması tam sağalma ilə nəticələnir. Ona görə də prostat ağrısı zamanı özbaşına müalicə ilə məşğul olmaq əvəzinə, mütəxəssisə müraciət etmək lazımdır.
